21, అక్టోబర్ 2010, గురువారం

సాధారణ జ్వరాలు - తీసుకోవలసిన జాగ్రత్తలు




"జరుగుబాటుంటే జ్వరమంత సుఖం లేద"న్నారు మన పెద్దవాళ్ళు....అప్పట్లో అంటే, సంవత్సరానికో, రెండు సంవత్సరాలకో ఓసారి అలా వచ్చి పలకరించి ఇలా వెళ్ళిపోయేవి జ్వరాలు...రోజూ కాయకష్టం చేసే వాళ్ళకి, అలా రెండ్రోజులు మంచం మీద పడుకుని, వేళకింత తింటూ(రోజూలా అదరాబాదరాగా కాకుండా) ఉంటే ప్రాణానికి కాసింత సుఖంగానే అనిపించేదేమో! కాని మన రోజులకి అది అంత సరిపడదేమో! ఒక్కరోజు ఆఫీసుకి వెళ్ళకపోయినా జీతంలో కోత! productivity తగ్గిపోతుందిగా మరి! పైగా నెలకోసారి వచ్చే జ్వరాలతో ఎలా?.......మరి ఇలాంటి జ్వరాలకి జరుగుబాటు ఎలా ఉంటే, మనసుకి,శరీరానికి కాస్త హాయిగా ఉంటుందో తెలుసుకుందామా........

అసలు ఈ జ్వరం అంటే ఏంటి? ఎందుకు వస్తుందో ముందు టూకీగా తెలుసుకుందాం........మన శరీరం యొక్క ఉష్ణోగ్రత (core body temperature) మామూలుగా రోజువారీ ఉండేతేడాలకన్నా(diurnal variations అంటే మన శరీర ఉష్ణోగ్రత ఉదయం పూట,రాత్రి పూట వేరువేరుగా ఉంటుంది) పెరిగితే దాన్ని జ్వరం అనొచ్చు....... అంటే శరీర సాధారణ ఉష్ణోగ్రత 37'c or 98.4'F అనుకుంటే, ఒక డిగ్రీ ఎక్కువ వరకూ నార్మల్ గా తీసుకోవచ్చు.(100'F వరకూ).........ఈ జ్వరం అనేది ప్రత్యేకమైన వ్యాధి కాదు...అంతర్గతంగా ఉన్న ఒక వ్యాధి యొక్క బాహ్య లక్షణం(DISEASE SYMPTOM) మాత్రమే.కాబట్టి జ్వరానికి కారణాలు ఏదైనా కావచ్చు.మామూలు వైరల్ ఫీవర్స్ దగ్గరనుంచి విషజ్వరాలు,క్యాన్సర్లు కూడా కావచ్చు...ఒక్కొక వ్యాధికి జ్వరలక్షణం ఒక్కోరకంగా ఉంటుంది.....అంటే, fever periodicity,high or low grade, associated vth chills and rigors, other associated symptoms ఇలాంటివి అన్నమాట.

ఇంకో ముఖ్యమైన విషయం ఏంటంటే, మన వాళ్ళు సాధారణంగా ఒక అపోహ పడుతుంటారు..."జ్వరం బైటకి కనపడట్లేదు, ’లో జ్వరం’ ఉంది" అని....అలాంటిది ఏమీ ఉండదు..జ్వరం అంటే బయటికి కనిపించేది మాత్రమే....ఇది ప్రత్యేకంగా ఎందుకు చెప్తున్నానంటే, చాలా మంది "లోజ్వరం" ఉంది అని టాబ్లెట్లు మింగేస్తుంటారు..దాని వల్ల ఉపయోగం ఏమీ లేకపోగా, లివర్ దెబ్బతినే అవకాశం ఉంది......

ఇక ఫీవర్ ఎంత ఉందో, కరెక్ట్ గా ఎలా చూడాలో చూద్దాం......ఈ రోజుల్లో రకరకాల థర్మామీటర్స్ దొరుకుతున్నాయి....డిజిటల్, ఊరక చేత్తో పట్టుకుని చూసేవి ఇలా......కాని అన్నిటికన్నా బెస్ట్ ఒన్, మన పాత గ్లాస్ థర్మామీటర్(దీన్నే CLINICAL THERMOMETER అంటారు).......body temperature is best measured when it is done per rectally.కాని అలా చెయ్యటం ప్రాక్టికల్ గా కుదరదు కాబట్టి, నాలుక కింద పెట్టి చూడటం(ఒక నిమిషం పాటు) ఉత్తమం....(చేతికింద అంటే చంకలో పెట్టి చూసిన రీడింగుకి ఎప్పుడూ ఒక డిగ్రీ ఎక్కవ కలపాలి.)......చూసే ముందు,తర్వాత థర్మామీటర్ ని శుభ్రంగా తుడవాలి....మరీ చల్లటి నీళ్ళని కాని, మరీ వేడి నీళ్ళని కాని ఉపయోగించవద్దు...దీనివల్ల తప్పు రీడింగు రావటమే కాకుండా, థర్మామీటర్ పగిలిపోయే అవకాశం కూడా ఉంది....చూసేప్పుడు థర్మామీటర్ టిప్ ని పట్టుకోవద్దు..దీనివల్ల చూసినవాళ్ళ బాడీ టెంపరేచర్ ట్రాన్స్మిట్ అయ్యి రీడింగు తప్పు వచ్చే అవకాశం ఉంది.

ఇక మనం తీసుకోవలసిన జాగ్రత్తల గురించి చూద్దాం....
A) మొదటిది...మామూలు చిన్న చిన్న జ్వరాలకి డాక్టర్ దగ్గరికి పరిగెట్టనవసరం లేదు.....వెళ్ళి వాళ్ళు ఇచ్చే గుప్పెళ్ళ కొద్దీ మందులు మింగవలసిన అవసరం లేదు.దానివల్ల ఆ మెడిసిన్స్ వల్ల వచ్చే unnecessary side effects భరించటం తప్ప ఏమీ ఉపయోగం ఉండదు.......మరి ఎలాంటి జ్వరాలకి వెళ్ళాలి? ఏది పెద్ద జ్వరమో, ఏది చిన్నదో ఎలా తెలుస్తుంది?.......
a)జ్వరం కాకుండా ఇంకేమన్నా ఇబ్బందులున్నాయో చూసుకోండి.ఇది చాలా జాగ్రత్తగా అబ్జర్వ్ చేసుకోవాలి.ఎందుకంటే జ్వరం తీవ్రంగా ఉన్నపుడు మిగతా లక్షణాలు మాస్క్ అవుతాయి......విపరీతమైన దగ్గు, కళ్ళె....యూరిన్ తో చురుకు, మంట...విపరీతమైన చలి, వణుకు(మామూలుగా కొంత వరకు చలి,వణుకు ఉంటాయి,దాన్ని పెద్దగా పట్టించుకోనవసరం లేదు).... శరీరంలో ఎక్కడన్నా గడ్డల్లాంటివి,బిళ్ళలు కట్టటం......ఆగని వాంతులు,తట్టుకోలేని తలనొప్పి,చూపు మసక బారడం,మెడ బిగుసుకు పోవడం(ఇవి మెదడువాపు (meningitis)లక్షణాలు)....విపరీతమైన కీళ్ళనొప్పులు(జ్వరంతో పాటు మామూలుగా వళ్ళు నొప్పులు ఉంటాయి.అది సాధారణం).....పిల్లల్లో మరీ poor activity,feed అసలు తీసుకోకపోవడం...వంటి మీద పొక్కులు,rash రావటం.......కళ్ళు,యూరిన్ పచ్చగా రావటం.......ఇలా......
b) రోజు మొత్తం మీద ఒక్కసారి కూడా బాడీ నార్మల్ టెంపరేచర్ కి రాకపోవడం.... ఎంత పారాసిట్మాల్ వాడినా, తడిబట్ట పెట్టినా తగ్గకపోవడం...
c) బాడీ టెంపరేచర్ 106'F కన్నా ఎక్కువ ఉన్నప్పుడు..దీన్నే HYPER PYREXIA అంటారు...
d)వడదెబ్బ తగిలినప్పుడు,ఏదన్నా మందులు మింగినప్పుడు.....దీన్నే HYPER THERMIA అంటారు...ఇలా వచ్చిన జ్వరం మామూలు పారాసిట్మాల్ లాంటి మందులకి తగ్గదు...
ఇలాంటి జ్వరాలకి డాక్టర్ దగ్గరకి వెళ్ళాల్సిందే..................

B)నిన్న మా ఫ్రెండు ఒకళ్ళు హడావుడిగా ఫోను..."కౌటిల్యా! మా అక్క వాళ్ళ బాబు కి 105 fever..ఊళ్ళో డాక్టర్లు ఎవరూ లేరు.ఏం చెయ్యాలి?" అని....ఇలాంటి పరిస్థితి దాదాపు అందరికీ ఎప్పుడోకప్పుడు ఎదురవుతుంది...సడన్ గా అర్థరాత్రి జ్వరం ఎక్కువైపోతుంది..ఏం చెయ్యాలో కాలూ, చెయ్యి ఆడని పరిస్థితి!!!
ఇలాంటప్పుడు మన చేతుల్లో ఉండే మహత్తరమైన remedy, COLD SPONGING(తడిబట్ట పెట్టటం)....THIS IS THE MOST EFFECTIVE KIND OF MEASURE.....ఊరికే నుదురు మీద తడిబట్ట వెయ్యటం కాదు,దాని వల్ల ఏమీ ఉపయోగం ఉండదు....తలదగ్గరనుంచి, పాదాలవరకూ తడిబట్టతో ఆపకుండా continuousగా తుడుస్తూనే ఉండాలి....ఇలా తుడవటానికి ఏ నీళ్ళు వాడాలి? మామూలు room temperature దగ్గర ఉన్న నీళ్ళనే ఉపయోగించాలి...అంతేకాని, ice cubes or ice cold water వాడకూడదు,అలా వాడితే పేషెంట్ షాక్ లోకి వెళ్ళిపోయే ప్రమాదం ఉంది......మరీ చలిగా ఉంటే కొంచెం గోరువెచ్చటి నీళ్ళని కూడా ఉపయోగించవచ్చు....ఈ cold sponging, main aim అల్లా, బాడీ టెంపరేచర్ extremes కి raise అవ్వకుండా చూడడం...అప్పుడు ఎలాంటి అపాయమూ ఉండదు.....తుడిచేటప్పుడు పేషెంటు కాళ్ళకింద రెండు దిళ్ళు(పైన బొమ్మలోలా) ఎత్తు పెట్టాలి...ఇది తప్పని సరి.....cold sponging మామూలుగా అన్ని జ్వరాలకి చెయ్యాలి...

C) ఇక మామూలు జ్వరానికి వైద్యం.......పారాసిట్మాల్ 500mg(4yrs లోపు పిల్లలకైతే 250mg వెయ్యాలి syrup forms దొరుకుతాయి) మూడు పూటలా,అంటే 8 గంటల తేడాతో వేసుకోవాలి....ఏదన్నా తిన్న తర్వాత మాత్రమే వేసుకోవాలి....it is the most efficient and cost effective excellent drug to control fever...క్రోసిన్,మెటాసిన్,కాల్పాల్,సారిడాన్ ఇవన్నీ పారాసిట్మాల్ ట్రేడ్ నేమ్స్....ఏదైనా ఒకటే.....జ్వరం తగ్గింది కదా అని ఒక పూట వేసుకుని ఆపొద్దు...టాబ్లెట్ ఎఫెక్ట్ ఐపోగానే జ్వరం మళ్ళా వచ్చేస్తది..కాబట్టి కనీసం రెండు రోజుల వరకి 8hrs gap తొ తప్పని సరి......పారాసిట్మాల్ వల్ల వళ్ళునొప్పులు,మామూలుగా ఉండే తలనొప్పి తగ్గుతాయి....నొప్పులు మరీ ఎక్కువ ఉంటే, పారాసిట్మాల్ డోసు 650mg కి పెంచుకోవచ్చు...ఇది DOLO 650 అన్న trade name తో దొరుకుతుంది......పారాసిట్మాల్ వల్ల టెంపరేచర్ అసలు నార్మల్ కి రాకపోతే, ఒకరోజు తర్వాత better to consult a doctor and get the investigations done.....కొంతమంది జ్వరం వచ్చేట్టుంది అనగానే ఓ క్రోసిన్ వేసేసుకుంటారు..దీనివల్ల ఏమీ ఉపయోగం ఉండదు.జ్వరం రాకముందే పారాసిట్మాల్ వేసుకుంటే వచ్చే జ్వరం ఆగదు.....పారాసిట్మాల్ పెరిగిన టెంపరేచర్ ని మాత్రమే తగ్గిస్తుంది.....

D) ఇక జ్వరం వచ్చినప్పుడు అందరికీ కామన్ గా వచ్చే డౌటు.....ఏం తినాలి? అసలు తినాలా వద్దా? "లంఖణం దివ్యౌషధం" కదా,అందుకని పూర్తిగా మానేస్తే సరిపోద్దా!...ఇలా బోల్డు అనుమానాలు.......... any infection especially fever is a high metabolic state....అంటే మామూలుకన్నా జ్వరంగా ఉన్నపుడు శరీరానికి metabolic needs ఎక్కువగా ఉంటాయి..అంటే మామూలుకన్నా ఎక్కువగా తినాలన్న మాట! కాని పొట్ట భరించలేదే.....మన వాళ్ళు పెట్టే పథ్యానికి నోరు అస్సలు సహించదు కూడాను......కాబట్టి నోటికి ఆ సమయంలో తినాలనిపించినవి(తినాలనిపిస్తే ఆవకాయ,నెయ్యి వేసుకుని చక్కగా లాగించెయ్యండి.పొట్టలో మంటొస్తే తర్వాత చూసుకుందాం), తేలిగ్గా అరిగేవి(ఇడ్లీ is the best food..brea, bun ల్లో ఏమీ ఉండదు..more liquid diet is better) చూసుకుని, తక్కువ మోతాదుల్లో(మరీ ఎక్కువెక్కువ పట్టిస్తే తిప్పి బైటక్కొట్టే ప్రమాదముంది) ఎక్కువసార్లు లాగించెయ్యడమే! పాలు తాగే పిల్లలకి వీలైనన్ని ఎక్కువ సార్లు పాలు పట్టించాలి...

E) ఇక జ్వరం తగ్గక డాక్టర్ దగ్గరికి వెళితే EPIDEMIC గా ఉన్న జ్వరాలన్నిటికీ పరీక్షలు చేయించుకోండి......టైఫాయిడ్ మాత్రం 7th day of fever తర్వాత మాత్రమే DIAGNOSIS చెయ్యటం కుదరుతుంది....అలా కాకుండా ఏ డాక్టరన్నా మీకు ముందే టైఫాయిడ్ టెస్ట్ చేయిస్తే(చేయించి కొంచెం ఉందని చెప్పినా), ఒకటి ఆ డాక్టర్ కి తెలియదు, రెండు మిమ్మల్ని మోసం అన్నా చేస్తున్నట్టు....కాని test చేయించకుండా కొంతమంది emperical గా treatment పెడుతుంటారు....in such case u can wait till the test comes positive i.e. 7th day or u can proceed with the emperical treatment coz treatment is mostly same for typhoid and other bacterial fevers...

F) డాక్టర్ ఇచ్చిన కోర్సు ఏదైనా, అది మలేరియా కోర్సు అయినా, యాంటీ బయాటిక్ అయినా పూర్తిగా వాడండి....జ్వరం తగ్గింది కదా అని మధ్యలో మానెయ్యొద్దు...జ్వరం మళ్ళా తిరగబెట్టె అవకాశం ఉంది.....

G) ఈ మధ్య డెంగ్యూ లాంటి విషజ్వరాలు ఎక్కువగా ఉంటున్నాయి..వాటిని వీలైనంత త్వరగా గుర్తించి( high fever, joint and muscle pains with rash) సరైన వైద్యం చేయించుకోండి....(డెంగ్యూలో BLOOD PLATELET COUNT తగ్గుతుంది..కాబట్టి చిగుళ్ళనుంచి రక్తం రావటం,INTERNAL BLEEDINGS ఉంటాయి....కాబట్టి platelet replacement is essential...hence dont use normal pain killers like aspirin or voveran....only use paracetamol)

H) చాలా జ్వరాలకి కారణం దోమలు....prevention is better than cure..కాబట్టి దోమకాటు నివారణోపాయాలు పాటించండి....అన్ని mosquito repellents కన్నా best one is mosquito nets..(దోమ తెరలు)....

I) ఇక ఈ మధ్యకాలంలో కొన్ని జ్వరాలు నెలల తరబడి తగ్గట్లేదు....వీటినే FEVER OF UNKNOWN ORIGIN(FUO) or PYREXIA OF UNKNOWN ORIGIN(PUO) అంటారు...వీటిని డయాగ్నసిస్ చెయ్యటం చాలా కష్టం...కాబట్టి ఓపిగ్గా మీ డాక్టర్ కి investigations and diagnosis లో సహకరించండి......

J) ఇక మెడికల్ షాపు వాళ్ళు ఇచ్చినవో, లేకపోతే ముందు మీకు తెలిసినవో యాంటిబయాటిక్స్ అనవసరంగా వాడవద్దు...యాంటిబయాటిక్స్ life saving drugs..వాటిని ఆ purpose కి ఉండనివ్వండి....moreover antibiotics has no role at all in viral fevers...కాబట్టి వాడటం వృథా.....

K) చిన్నపిల్లలకి యాంటీబయాటిక్ సాధ్యమైనంతవరకి వాడొద్దు......రోజుల పిల్లలుంటారు..వాళ్ళకి తరచుగా వళ్ళు వెచ్చబడుతుంటుంది...ఖంగారు పడి పారాసిట్మాల్ సిరప్ లు పోసెయ్యొద్దు....మరిన్ని సార్లు తల్లిపాలు పట్టించండి...అదే సర్దుకుంటుంది.....

హ్మ్.....జ్వరం గురించి పూర్తి వివరాలు అందించాననుకోను.....మీకు మరేమన్నా అనుమానాలుంటే అడిగెయ్యండి.....you are most welcome.....

మీకు ఏవైనా ఇతర ఆరోగ్య సమస్యలుంటే నాకు మెయిల్ చెయ్యవల్సిన నా చిరునామా: choudary.koutilya90@gmail.com

27, సెప్టెంబర్ 2010, సోమవారం

నేను ముందు చూసిన "పా"; "PROGERIA" A RARE GENETICAL DISORDER










"పా"! చాలా రోజుల్నుంచి చూద్దాం అనుకుంటుంటే ఇవ్వాళ్టికి కుదిరింది.....అన్ని పాత్రల నటనా చాలా టచింగ్ గా ఉంటుంది.......
ఆగండాగండీ!
ఇక్కడ నేను ఆ సినిమా రివ్యూ రాయట్లేదు..సినిమాలు చూసి ఆనందించటమే కాని, రివ్యూలు రాసేంత టాలెంటు మనకి లేదు.....కనుక ఆ సినిమా, నాలో తట్టిలేపిన జ్ఞాపకాల్ని ఇక్కడ మీతో పంచుకుంటున్నా...

అక్కడ కథ మొత్తం తిరిగేది ముఖ్యంగా "ఆరో(AURO)" పాత్ర చుట్టూ....."పాపం పదమూడేళ్ళ కుఱ్రాడే" అని జాలేస్తుంది.....అలాంటి పిల్లాడు మనకి నిజజీవితంలో కనపడితే ఎలా ఉంటుందో కదా!

అవి నా ఫైనల్ ఇయర్ రోజులు....పీడియాట్రిక్స్ పోస్టింగ్స్! మమ్మల్ని ఎమర్జెన్సీ కేసులజోలికి వెళ్ళనిచ్చేవాళ్ళు కాదు, బాగా కంఫర్టబుల్ గా ఉన్న కేసులే ప్రెజెంట్ చేసేవాళ్ళం...ప్రతిరోజూ దాదాపు కేస్ ప్రెజెంటేషన్ కి నన్నే ముందుకు తోసేవాళ్ళు మావాళ్ళు..సో రోజూ కేస్ తీసుకుంటూ,చిన్నపిల్లలతో కబుర్లతో సరదాగా గడిచిపోయేది....ఒకరోజు మా మాడమ్ instruction class చెప్పి," ఇవ్వాళ cardio vascular system(గుండె,రక్త ప్రసరణ వ్యవస్థ) కేస్ ప్రజంట్ చెయ్యండి. 2 unit లో 8th బెడ్ లో కేస్ ఉంది.one hourలో కేస్ తీసుకుని రెడీగా ఉండండి.డిస్కస్ చేద్దాం" అని చెప్పి వెళ్ళిపోయారు....అందరం భారంగా స్టెత్ లు మెళ్ళో వేసుకుని వార్డుకి బైల్దేరాం.....

నేను మాన్యువల్ చూసుకుంటూ మెల్లగా కారిడార్ లో నడుస్తూ వెళ్తున్నా....వార్డ్ కి ఎమర్జెన్సీరూమ్ మీదగా వెళ్ళాలి...ఎమర్జెన్సీకేస్ లు manage చెయ్యటం నాకు చాలా challenging గా ఉండేది..ఎప్పుడు అటుగా వెళ్ళినా ఒక లుక్కేసే వాణ్ణి... అప్పుడు,లోపల చూస్తే ఒకామె పిల్లవాణ్ణి ఎత్తుకుని, కళ్ళనీళ్ళు పెడుతూ కూర్చునుంది...ఒళ్ళో ఉన్న పిల్లవాణ్ణి చూడగానే నా కళ్ళు అక్కడే ఆగిపోయాయి...అప్రయత్నంగా నా కాళ్ళు అటుకేసి నడిచాయి......ఆ పిల్లవాణ్ణి చూడగానే నాకు కాసేపు ఏమీ అర్థం కాలేదు...బాగా ఎగశ్వాసగా ఉన్నాడు....హడావుడిగా వచ్చిన పీజీ మేడమ్, పిల్లవాణ్ణి ఎత్తుకెళుతూ నన్ను చూసి,"కౌటిల్యా! ఇక్కడేం పని.వార్డుకి వెళ్ళు"..అన్నారు..................నేను,"మాడమ్! ఈ కేసు......" అని ఆగిపోయా!.....మేడమ్,"PROGERIA(ప్రోజీరియా),A RARE GENETIC DISORDER.అయినా ఈ కేస్ మీకు అవసరంలేదులే...కావాలంటే ACUTE EPISODE తగ్గాక రేపు వచ్చి చూడు", అని చెప్పి హడావుడిగా వెళ్ళిపోయారు.....


"ప్రోజీరియా", ఈ మాటవిని ఆ పిల్లాడి వంక చూడగానే, ముందు చదివిందంతా గుర్తొచ్చింది......
"PROGERIA, A VERY RARE FORM OF GENETIC DISORDER....కోట్లల్లో ఒకళ్ళల్లో కనపడుతుంది....ప్రపంచం మొత్తంమీద ఇప్పటికి 30-40 cases మాత్రమే NOTE అయ్యాయి......ముఖ్య లక్షణాలు: failure to thrive(బరువు పెరగకపోవటం), macrocephaly with baldness that progesses to alopecia i.e. complete loss of hair and engorged veins(పెద్దతల.ముందు బట్టతలతో తర్వాత తర్వాత జుట్టు మొత్తం రాలిపోతుంది, కనుబొమలతో సహా...తల మీద నరాలు ఉబ్బి ఉంటాయి)...pinched nose, pegged teeth(నొక్కుకున్నట్టుండే ముక్కు, రాలిపోయిన పళ్ళు).....early starting of aging process..(ఐదేళ్ళకే యాభయ్యేళ్ళ రూపం)....ALTERED AND KERATINISED SKIN TEXTURE(ఎండిపోయినట్టుండే చర్మం).....కాని normal mental and behavioural development...అంటే మనసుకంటే శరీరం ఓ పదిరెట్ల వేగంతో తన వయసుని పెంచేసుకుంటుంది....ఆరోగ్యం కూడా అలానే పెద్దవయసుదై పోతుంటుంది....fragile body, repeated fractures and joint dislocations....ముఖ్యంగా గుండె, రక్త ప్రసరణ వ్యవస్థ బాగా దెబ్బతింటాయి....repeated heart strokes....ఎవ్వరూ పదమూడు, పద్నాలుగేళ్ళకన్నా బతకరు...no treatment and prevention measures till date(వైద్యం కాని, నివారణ కాని లేదు)"

ఈ వాక్యాలు, మనసులో మెదులుతుంటే భారంగా వార్డ్ వైపు అడుగులేశా....మా వాళ్ళు హడావుడిగా "ఎమర్జెన్సీ తర్వాత డీల్ చేద్దురు డాక్టర్ గారూ!ముందు వచ్చి ఈ కేస్ సంగతి చూడండి"..అన్నారు..."నాకు ఇవ్వాళ మూడ్ లేదురా" అని పుస్తకంలో తల దూర్చేశా...అది గమనించిన సుబ్బు,"కేస్ నే తీసుకుంటాగాని, ఏమైంది నీకు?ఇప్పటిదాకా బానే ఉన్నావుగా" అని అడిగాడు..."ఏం లేదురా" అని మళ్ళా తల దించేశా....కళ్ళు లైన్ల వెంట పరిగెడుతున్నా, మనసుకి మాత్రం ఏదో ఉద్వేగం, బాధ...కళ్ళ ముందు ఆ పిల్లాడి ముఖమే మెదులుతుంది....తర్వాత క్లాసులో కూడా......

తర్వాత రోజు ఉదయం, ఓ గంట ముందు హాస్పటల్ కి వెళ్ళిపోయా....నన్ను చూడగానే పీజీ మేడమ్"అనుకున్నా, నువ్వు వస్తావని" అని కేస్ గురించి చెప్పటం మొదలెట్టారు....ఎప్పుడైనా మంచి కేస్ ఉంటే ముందుగా వచ్చి, వాళ్ళని చావగొట్టే నేను, ఆ పిల్లాణ్ణి చూట్టానికి వచ్చా అని ఎలా చెప్పగలను?? నేను మాత్రం ఆ పిల్లాణ్ణి చూస్తూ అలానే ఉండిపోయా! మేడమ్ చివరగా ముగిస్తూ,"ఇది చాలా rare case కౌటిల్యా! ఈ 25yrs లో ఎప్పుడూ రాలేదు.దేశం మొత్తంమీద ఒక ఇరవై ఉంటాయేమో!" అని చెప్పి వెళ్ళిపోయారు.....ఇంకొకప్పుడైతే,"YES! MINE IS BEST COLLEGE..మాలాటి క్లినికల్ మెటీరియల్ ఏ కాలేజ్ లో దొరకదు." అని చంకలు గుద్దుకుంటూ ఆనందపడే వాణ్ణి...కాని మచ్చుక్కూడా ఆ ఫీలింగ్ కలగలా! అలానే ఆ పిల్లాణ్ణి చూస్తూ ఉండిపోయా!

పైగా, "పా" సినిమాలో "ఆరో"ది fair complexion...అందువల్ల అంత వికృతంగా అనిపించదు("పా" రెండేళ్ళ తర్వాత వచ్చింది)....కాని ఈ పిల్లాడు complete dark complexion, పైగా బీదకుటుంబం కావటం వల్ల పోషణ సరిగ్గా లేకపోవటం, మరీ వికృతంగా ఉన్నాడు...just a monster...స్పెసిమన్స్ గా, లైవ్ గా చాలా monster babies ని చూసినా ఎప్పుడూ ఇలాంటి ఫీలింగ్ కలగలా! ఏదో ఇది అని తెలియకుండా, మనసుని మెలిపెడుతున్న ఫీలింగ్!!! "డాక్ట్రర్లు, పేషెంట్ బాధని మనసుకి తీసుకోకూడదు.తీసుకుంటే వైద్యం చెయ్యలేరు" అన్న principle ని ఖచ్చితంగా పాటించేవాణ్ణి, నేను..ఎన్ని హృదయ విదారకమైన దృశ్యాలు చూసినా చలించని నా మనసుని, ఉద్వేగ పడకుండా ఆ నిమిషం పట్టుకోలేకపోయా!



మేడమ్ వెళ్ళగానే ఆ పిల్లాడి తల్లి ఏడుస్తూ"డాక్టర్ గారూ! ముందంతా బానే ఉన్నాడండీ..రెండేళ్ళప్పటినుంచి మొదలైంది...మెల్ల మెల్లగా ఇలా ఐపొయాడు...మొదట్లో ఎవ్వరికీ చూపించకుండా దాచుకుంటూ వచ్చా! కాని వాడికీ అందర్లా ఆడుకోవాలనీ,బడికెళ్ళాలనీ ఉంటదిగా! తోటి పిల్లలందరూ"తాతా, తాతా" అని ఏడిపిస్తున్నారని చెప్తే వాడి బాధ ఎలా తీర్చాలో నాకు చేతగావటం లేదు సారూ! మా వాడు మామూలుగా అవుతాడా!"....అని ఆ తల్లి అడుగుతుంటే, ఏం చెప్పాలో అర్థంకాలేదు.. భాధతో గొంతు పూడుకుపోయింది....మేడమ్ వాళ్ళు అంతా చెప్పేఉంటారు కదా! అయినా ఆ పిచ్చితల్లి, నేనేమన్నా positiveగా చెప్తానేమో అని ఆశతో అడుగుతుంటే, ఏం చెప్పాలో అర్థంకాక, నాకు తెలిసిన డైట్ ADVICE(high calorie diet is the main stay of management) చెప్పి
వెళ్ళిపోతూ ఒక్కసారి ఆ పిల్లాడి వంక చూశా.......

అలానే నా వంక చూస్తున్న ఆ ఏడేళ్ళ పిల్లాడి కళ్ళల్లో, ఏదో తెలియని నిర్వేదం...ఒక వైరాగ్యం లాంటి భావన..."మీ అందరికంటే అప్పుడే నేను పెద్దవాణ్ణైపోయాగా" అని చెప్తున్నట్టున్న ఆ చూపులు............గుర్తొచ్చినప్పుడల్లా ఒక్కసారి మనసుని కుదిపేస్తాయి...






21, సెప్టెంబర్ 2010, మంగళవారం

మీ సమస్యలు..నా సలహాలు


"ఆరోగ్యమే మహాభాగ్యం"....ఈ సూక్తిని ఏదో ఊరికే నేర్చుకున్నా, నా అనుభవంలోకి వచ్చాకే అది బాగా అర్థమవుతోంది......ఇన్నాళ్ళ నా వైద్యుడి జీవితం నాకు ఆ సూక్తికి అసలు రూపాన్ని చూపించింది....ఇప్పుడు ఏ పేషెంటుని చూసినా అదే ప్రతిక్షణం మనసుకి తగులుతూ ఉంటుంది...... డాక్టర్ గా కాక, ఒక మామూలు వ్యక్తిగా ఫీల్ అయ్యి, ఒక పేషెంటుగానో, లేక అటెండెంట్ గానో ఉన్నప్పుడు ఈ విషయం ఇంకా బాగా అర్థమవుతోంది....

ఎంతోమందిని చూస్తుంటాను! కొత్తవాళ్ళైనా, "డాక్టర్ని" అని చెప్పగానే, వాళ్ళకున్న హెల్త్ ప్రాబ్లమ్స్ అన్నీ వెళ్ళబోసుకుంటుంటారు....సరైన గైడెన్స్ లేక వాళ్ళు ఎన్ని ఇబ్బందులు పడిందీ,పడుతుందీ చెప్తుంటారు...... నా సన్నిహితులు,బంధువులు ఎప్పుడు వాళ్ళకి ఏ హెల్త్ ప్రాబ్లమ్ వచ్చినా, ఫోన్ చేసి అడుగుతుంటే, "వీళ్ళకైతే నేను చెబుతున్నాను! మిగతా వాళ్ళంతా ఎలానో కదా!" అని అనిపించేది...బ్లాగు సోదరి గారు "యాంటీబయాటిక్స్" గురించి అనుమానం అడిగినప్పుడు ఆ ఆలోచన మరింత బలపడింది.....ఈ మధ్య నాకు ఎదురైన కొన్ని అనుభవాలు ఆ ఆలోచనని మరికాస్త ముందుకు నెట్టాయి...అందరికీ ఈ దిశగా కొంత ఉపయోగపడాలన్న నా ఆలోచనలకి కార్యరూపమే ఈ బ్లాగు......

పైగా ఈ కాలపు డాక్టర్లన్నా,వాళ్ళ వైద్యమన్నా ఎవరికీ సరిగ్గా నమ్మకం ఉండట్లేదు,మన మీడియా ప్రభావమేమో!....."డబ్బులకోసమే అంతా చేస్తుంటారు,ఇన్ని టెస్టులు ఎందుకు చేస్తారో అర్థంకాదు" అనుకుంటుంటారు.....దానికి కొంత వరకి మా డాక్ట్రర్లే కారణం....పేషెంట్ కి అర్థమయ్యే రీతిలో చెప్పలేక పోవటం ఒక కారణమైతే, రెండవది అందుకు సరైన సమయాన్ని కేటాయించలేక పోవడం......అందరికీ సాధారణంగా వచ్చే ఈ అనుమానాలకి ఎలా సమాధానం ఇవ్వాలా అనుకుంటున్నపుడు నాకు తట్టిన ఆలోచనే ఈ నా"వైద్యశాస్త్రం"......
పైగా చిన్న చిన్న ఆరోగ్య సమస్యలకి డాక్టర్ దగ్గరికి పరిగెట్టి గంటలు గంటలు వెయిట్ చేసి,చివరికి ఓ పెద్ద మందులచీటీ చేత్తో పట్టుకుని రావాలంటే మధ్యతరగతివాళ్ళకి అన్నిరకాలుగా భారమైన పని....అలా అని పూర్తిగా లైట్ తీసుకున్నా ప్రమాదమే....కాబట్టి దానిక్కావాల్సింది సరైన గైడెన్స్ అనిపించింది.....అందుకే ఈ "వైద్యశాస్త్రం" తో మీ ముందుకు వస్తున్నాను........

మీకు ఎలాంటి ఆరోగ్యపరమైన సమస్యలున్నా నాకు మెయిల్ చెయ్యండి.....మీ సమస్యలకి నా సలహాలని ఈ బ్లాగు ముఖంగా తెలియజేస్తాను..అది మిగతావారిక్కూడా ఉపయోగకరంగా ఉంటుంది.........ఇంకో ముఖ్యమైన విషయం....ఇక్కడ మీ సమస్యలకి సలహాలని మాత్రమే చెప్పి, మీకు సరైన గైడెన్స్ ఇవ్వటం మాత్రమే ముఖ్య ఉద్దేశ్యం...అంతేకాని, డైరెక్ట్ గా ఎలాంటి వైద్యమూ చెప్పటం జరగదని మనవి......

నా మెయిల్ ఐడీ :- choudary.koutilya90@gmail.com

ధన్యవాదాలు